KUMENDAN

Eman Rais

Fikmin #KUMENDAN#
Sabada operasi pager bitis ningker GPK gorombolan pengacau keamanan, hiji komandan gawena ngan nyarekan wae ka hiji anak buahna. Sigana mah alatan timburu pedah anak buah rajin temen sok untar anteur pamajikan ngorana anu tacan boga anak, teuing ka pasar boh katoko. "Ari sia kunaon make lus los ka imah mitoha aing?" Harewosna teleb. "Hooor bapa kumendan, kapan kawajiban uing ngajaga kasalametan ibu kumendan." Cak anak buah bari ramona rajeun weh ngelapan laras bedil Lee Enfield kameumeutna. "Naha atuh ari sia make iluan meuting sagala?" Cak komandan bari ragap leungeuna ngeplak hulu anak buah nepikeun ka mecleng topi pet hejona. "Hooor bapa kumendan, kumaha tah upami ibu kumendan diculik ku gorombolan. Naha salira bapa kumendan bade tanggel waler?" Gagang bedil diantelkeun kana taktakna, terus manehna ngeker ngekerkeun bedil ka beh hareup. Sasakali bedil dikokang nepi ka pelorna mecleng, tapi teu nepi ka murag kana taneuh, kapan sigap disanggap ku tapak ramona anu hideung lestreng.

Ngadadak rame beledag beledug sora tembakan ti lebah leuweung geledegan. Rame pelor nembrak kana dangdaunan, pating burinyai ngeunaan batu gunung. Teu antaparah, komandan nyabut pestol bari ngajol, hayang nyaho ti beulah mana arah tembakan datangna. Anak buah ngajleng, komandan ngajengkang bucat huluna.

 ·  ·  · Saturday at 9:18pm