KOMANDAN

Eman Rais

Fikmin #KOMANDAN#
Sabada operasi pager bitis ningker GPK gorombolan pengacau keamanan, hiji komandan gawena ngan nyarekan ka hiji anak buahna. Sigana mah alatan timburu pedah anak buah rajin temen sok untar anteur pamajikan ngorana anu tacan boga anak. "Ari sia kunaon make lus los ka imah mitoha aing?" Harewosna teleb. "Hooor bapa kumendan, kapan kawajiban uing ngajaga kasalametan ibu kumendan." Cak anak buah bari rajeun weh ngelapan laras bedil Lee Enfield. "Naha atuh ari sia make iluan meuting sagala?" Cak komandan bari leungeuna ngeplak hulu anak buah nepikeun ka mecleng topi pet hejona. "Hooor bapa kumendan, kumaha tah upami ibu kumendan diculik ku gorombolan. Naha salira bapa kumendan bade tanggel waler?"

Ngadadak rame sora tembakan ti lebah leuweung geledegan. Rame pelor nembrak kana dangdaunan, pating burinyai ngeunaan batu gunung. Komandan nyabut pestol bari ngajol, hayang nyaho ti beulah mana arah tembakan. Anak buah ngajleng, komandan ngajengkang bucat huluna.

 ·  ·  · Saturday at 9:37pm