SUPIR

Eman Rais

Fikmin #SUPIR#
Réngsé markirkeun mobil sédan, Nu’ih mencét rémot keur ngonci panto mobil. Terus ngangkat leungeun katuhu, méré tanda ka dunungan. Rep wéh mesin mobil pareum. Terus Nu’ih kakantin, mesen cikopi sacangkir. Manéhna ngadeukeutan babaturan papada supirna, anu keur dariuk ngawangkong. “Lain, lamun dipikir pikir mémang béda, bangsa urang jeung bangsa deungeun.” Gakgak seurina bari milu diuk dina kursi panjang, ragamang nyokot bungkus rokok kéréték anu baturna. “Ménta hiji euy. Keur kutud yeuh.” Omongna bari nyekréskeun panékér. “Kunaon kituh euy?” Tanya Sardi. “Tempo wéh, salaku supir urang ngan dibahanan rémot, teu mawa konci.” Omongna. “Ari koncina dimana?” Tanya Misro. “Teu maké konci. Pokona lamun dunungan arék balik. 15 menit saméméhna geus mencét hapé, keur ngahirupkeun mesin jeung aséna. Kitu asup kapan mobil geus panas, jeung kabin geus tiis. Kitu datang, urang nyampeurkeun mobil. Mencét rémot terus diuk dina ruang kemudi.” Cak Nu’ih ngagakgak, nempo beungeut héran babaturana.

 ·  ·  · 2 seconds ago