Minggu, 08 April 2012

KAMANA


Fikmin # kamana #

Poe ieu karasa cakuem padahal panon poe moncorong komo langit mah lenglang, euhhhhh..... lalangit hate kuring nu angkeub mah geuningan, Tuti ngagerendeng sorangan. Leos ka pipir manehna kalah ngurilingan dapuran cau, cenah pajar teh tadi siga si akang nguliwed nyumputan, belenyeng ka buruan beretek lumpat ngudag nu lempang, pas malik geuning lain ieu mah geuning mang Dodo tukang samak, manehna balik siga nu lungse sup asup ka enggon, pajar teh di enggon asa di kamar cai tiis kabina- bina, tungtungna hing weh ceurik bangun kanyeyerian bari sasambat,
" ayangggggggg aku lagi galau , di telepon teu diangkat, SMS teu dibales, naha kamana atuh, sadinten jeput abdi ngantosan tranfer nu teu acan dugi wae, tos teu kiat hoyong balanja sareng ka salon hik hik hik "
 ·  ·  · Friday at 2:50pm

RINGRANG


Fikmin #RINGRANG#
Moal aré k ngabibisani, balik nyaba awak asa ripuh. Jaba haté tiris deuih, kapan éta rasa tiis nyecepna nyaliara ka sakujur awak. Geus dikerokan pé dah ngarasa asup angin. Geus diurutan, pédah sajajalan aya salilalila kabekuk dina korsi beus wisata. Iwal tisaré nikmat waktu di hotél. Kajaba asal eureun diobyék wisata, kapan néangan kios anu ngajual pocer, pédah geus dua poé béakeun pulsa. Dihaja hapé dipareuman, kapan lamun nampa sms moal bisa ngawales, paur matak tada teuing keuheulna kaanu nungguan waleran. Héhé biasalah, kapan teu dihurang teu dikeuyeup, kasono mah sarua waé. Kitu balik sapeupeuting ngirim sms jeung béwara anu lebéng, tepi kaayeuna euweuh pisan balesanana. Huh, ganti nomer kituh? 3 kali nelepon nada sibuk waé.Beu ngambek meureun. Sakali deui, karak kadéngé sora nyambung. “Assalamualaikum.” Tah aya sorana anu teuing ku halimpu, matak nyecep kana haté. Ngaleungitkeun karingrang, ngahaneutan qalbu jeung katrésnan. Alhamdulillah. Nuhun Gusti. Rupana ning loba sémahna.
 ·  ·  · 2 seconds ago

Sabtu, 07 April 2012

BUNGKUS


Fikmin #BUNGKUS#
Abong kuagulna juragan Haji Samid ka putrina, anu saurna sakola mung dugi ka kelas 3 Sakola Dasar di Cibangkong. Saurna néng Sanih Lasmini, tos mindeng ngiring latihan janten modél iklan sareng béntang pelem. Saurna néng Sanih mah ageung bakat bakal janten modél kelas internasional. Saurna bakal setara sareng Sophia Loren ti Amerika. Kamari wengi wae waktos ngarayakeun ulangtahun ka 17, kapan dilaksanakeun direstoran pangawisna di Laan Braga. Bakat kuteuséépna katuang, sadaya sésa tuangan disuhunkeun ku nyonyah Ipong ka pelayan, supados dibungkus. Keur tuangan ucing, cénah mah. “Dupi anu badé dibungkus sésa anu mana waé, juragan?” Saur pelayan. “Sakabéhna waé, naon waé sésa tuangeun. Kapan lebar, jaba lumayan keur paragi ucing neda.” Teu talangké, kepala pelayan nyanggakeun 2 bungkusan ageung, sésa tuangeun naon waé. Anu ditampi ku juragan nyonyah Ipong, bangun sugema naker.
 ·  ·  · 

Jumat, 06 April 2012

KATRESNAN


Fikmin #KATRESNAN#
Katrésnan. Sarantos sumping waktos anu mustari, kahoyong saénggalna sumping kana lahunan salira. Urang jaitkeun kadeudeuh tur kaasih salawasna. Sanaos angin tarik ngagelebut, langit angkeub hideung nutupan béngras haneutna saréngéngé. Keun teuing, kapan aya salira anu matak ngahaneutan sajeroning haté engkang. Permios badé angkat heula pancén tugas anu henteu tiasa dipungpang, kapan badé saha deui nya miang lamun sanés engkang. Heug antosan pamulang engkang masing tarapti, kin urang adumanis napakan deui poé anu matak tada teuing taeuna. Pileuleuyan katrésnan. Heug sanggap carécét, anu dihiberkeun kasalira dihaneut moyan. Katrésnan. Bakal kasebatkeun kakasih salira, dina gelebutna angin peuting. Anu nyaliara dina saresetna sacuruk getih, dina alur jeung galur hurip, dina sagenclangna munara cahya.
 ·  ·  · 37 seconds ago

RAJAPATI



Fikmin #RAJAPATI#
Hiji kalangkang peteng ajleng ajlengan euweuh sora, terus ngalayang ngaluncatan témbok. Terus ngajleng deui pas nyéngclé handapeun jandéla. Seleser manéhna gésér ka deukeut dapuran eros. Manéhna mebeskeun kerepus laken bari nagog. Jaba angin peuting ngagelebut, matak untung nyingkahkeun rambetuk. Poé karak tengah peuting, sanajan alam poék ku angkeub, sigana mah sakeudeung deui bakal der hujan. Matak ngeunah ngajalankeun aksina. Dekur manéhna ngaluarkeun mikropun, terus ditempelkeun kana kaca nako béh sisi anu panghandapna. Earphone diselapkeun kana liang ceuli. Terus amplifier mikro dihurungkeun lalaunan, disetel volume sacukupna baé. Kadéngé sora awéwé jeung lalaki keur ocon. Beuki lila ocon téa matak ngahudang birahi. Peuting mémang tiris matak awakna murungkut, tapi ngadéngé sora modél kitu, lila lila awakna asa ngahéab. Nyel ambek nyedek. Lalaunan manéhna cengkat ngabuka kaca nako. Terus nyekel péstol FN kalibér 32 anu maké peredam. Disingsatkeun lawon hordéng batik. Lalaunan ngabekaskeun pelor, katargét mangrupa hulu lalaki keur nindihan pamajikan ngorana.
 ·  ·  · 2 seconds ago

Kamis, 05 April 2012

ARAL


Fikmin # Aral#

Ceu Titi keur anteng dihareupeun imahna, kurang kerung bari kuraweud haseum, ditanya kusalakina kang Dudu.
" Ti kunaon meni siga nu ambek kitu?
" Cicing ah tong loba nanya , nyaho keur pusing "
" pusing ku naon ?"
" Aral rek mikmin nu pikasieuneun tapi teu bisa"
" tong maksakeun atuh da moal dipeunteun meureun"
" di dinya nu kudu maksakeun mah , atuh modalan pamajikan teh,matak naon pangmeulikeun komputer komo laptop mah uing atoh "
" har naha jadi ambek ka akang "
" nya heueuh atuh maenya mikmin ku kompor ? "
 ·  ·  · about an hour ago

CANGCAYA


Fikmin #CANGCAYA#
Reseplah nempoan ucing tea, kapan bulan kamari masih kumicir acleng aclengan sagala dirawu sagala dicoo. Tapi peuting ieu mah jigana keur beger. Kapan titadi Moly anu dikongkorong rante, enya gumelis ditutur tutur ku Joki, ucing jalu anu badag jung. Kitu Moly rek asup ka pager beusi, teu antaparah dirangsed bari digegel pundukna ku Joki. Kantenan sanajan bari eong eongan sieun oge, Moly teu walakaya. Kadenge balilihna, "sanes engkang. Moly mah teu percanten naha enya engkang tresna ka Moly. Kapan sakuliling engkang mah seueur wanoja anu gareulis piliheun, luhur pendidikanana, arageung komarana. Barang ari Moly mah naon?" Moly nyanggereng, bari suku tukangna pasang taki taki. Hulu tanggah punduk dibetot ku Joki. "Duh Moly, kapan salira mah anu utami. Geulis bageur, akuan, keibuan, sami2 seueur elmu ucing keur ngarawat loba budak tawis katresnan urang." Moly gagauran elekesekeng terus cakarna arek ngoet beungeut Joki anu luncat mundur. Molly gulang guling ngararasakeun kanikmat naker.
 ·  ·  · 2 seconds ago