Kamis, 05 April 2012

SALENGKAH


Fikmin #SALENGKAH#
Lain. Ieu mah kuring keur mikiran matematikana Socrates. Lamun ti dieu arek kapasar, urang ngalengkah salengkah salengkah. Matak tepi moal nyah? Nya nepi atuh lah. Kapan geus ilaharna kitu, jalama leumpang oge salengkah salengkah. Pon kitu deui lumpat, kapan sarua weh salengkah salengkah kajeun remen ngalengkahna. Ngan uing mikir pedah uing aya. Lamun inditna salengkah maju, terus salengkah mundur. Matakan nepi moalnya urang kapasar? Lamun cak DaVinci Coded mah nepi.
 ·  ·  · 2 seconds ago

SORA


Fikmin #SORA#
"Hapunten saderek, kami teu tiasa nampi nonoman kanggo jabatan penting ieu. Enjing enggal pendakan ibu Kuning, teras candak wae berkas lamaran saderek." Jekrek hubungan telepon SLI pegat weh. Ku aneh, ari di email kapan atra pesen ibu Kuning. Kedah nelepon langsung ka bapak Presiden Direktur pausahaan anu nuju di Malaysia, kanggo wawancara telepon. Huh tadina mah matak bungah, tos pangsiun tapi pangalaman masih kapake keneh keur jadi konsultan. Sanajan sapeupeuting humaregung teu bisa sare oge, tapi isuk isuk mah tetep indit mendakan ibu Kuning. Saatos ngantosan sajam, sakinten tabuh dalapan ibu Kuning sumping. Kitu ningali kuring anjeuna imut mani manis geulis. "Wilujeng enjing pak. Janten kumaha, iraha bapak siap angkat ka Brunai?" Hooor etah. "Tadi wengi bapak Hasan nelepon ka abdi, ulah nampi nonoman kanggo jabatan anu ditawiskeun ka pak Eman. Pak Hasan teu percanteneun upami pak Eman parantos 68 taun. Saurna mah soanten pak Eman siga nonoman 25 taun.”
 ·  ·  · a few seconds ago

Rabu, 04 April 2012

NYAAH


Fikmin# nyaah#

lamun kuring bareng jeung si ayang kudu we ninggali panon jeung paroman siga nu aneh , rajeun nanya matak nyentug kana hate, siga tadi isuk - isuk kuring ngajak si ayang jogging mapay lembur nu dilingkung gunung.
" aduh neng tuang eyang meni jagjag sareng katinggal anom keneh nya , masih kiat lari pagi "
" bi.... sanes pun aki ngenalkeun ieu pun lanceuk !"
Kuring dilembur ieu karek tilu poe anyar pindah, pantes can arapaleun nu mana salaki kuring, katinggali paroman bi Cucu siga nu era jeung reuwaseun, kuring ukur seuri bari terus amitan neruskeun lalampahan.
Terserah ah rek disangka itu ieu oge ku batur, ari kuring nyaah ka si ayang saha nu bisa ngahalang - halang, padahal umur kuring jeung si ayang teu sabaraha jauh kuring umur duapuluh opat taun si ayang genep puluh tujuh taun, naha batur bet ngarasa araneh teu ngarti kuring mah.
 ·  ·  · about an hour ago





ANGPLIPAYER


Fikmin #ANGPLIPAYER#
Bareto keur zaman Orba, memang loba syaiton di masjid. Make sapeker teu puguh wayah, sangeunah nongtot boolna weh. Unggal isuk jam 2 sapeker geus cocorowokan shalawat tarik naker. Kaitung du’a shubuhna parele, kakara angplipayer dipareuman. Kapan urangna weh balik kuliah tengah peuting. Isukan jam genep geus kudu indit kakantor. Makana sok males ririungan ka masigit, abong keuheul ka pangurusna. Kajaba lamun pas shalat jamaah Shubuh, kapan eta wungkul anu bisa. Ngalaksanakeun kawajiban agama jeung silaturahim ka warga saerwe. Kapan rumasa lamun engke paeh, dekan moal bisa mendem diri sorangan. Alhamdulillah, kiwari mah geus rapih tatalaksana masjidna oge. Boh Al Ikhlash di Tangerang, oge Baitul Huda di Jakarta. Jaba ngarasa awak geus kolot. Hirup ditutur ku mangsa, paeh ditutur ku pati. Ngararasakeun niis ceuli herang mata, milu ngasuh incu di sisi gunung Pancar di Bogor. Bari nebarkeun elmu panemu, piladang ibadaheun jaga. Sugan mangpaat keur perjuangan ummat, bari bungah nyesep katresnan.
 ·  ·  · 2 seconds ago

PARIRIMBON


Fikmin #PARIRIMBON#
Sapopoe uing huleng jentul, mikiran naon hartos impenan. Tadi peuting ngimpi huntu hareup beh handap coplok, bakat kukaget terus mandi diwalungan bari ditaranjang. Ras inget ka abah Beos, saharita uing sumping ngadeuheus. Kapan tos lami tara silaturahim ka karuhun. Untung weh abah aya keur ngamandian si Beos, manuk perkutut kameumeutna anu kari hiji hijina. Abah teras weh muka buku heubeul siga paririmbon, anu diserat dina aksara Kaganga. Teu ngarti uing mah. Teras wejangna, “Alhamdulillah. Gusti Allah maparin pangaping ka hidep, mangrupa guru elmu panemu. Makna waos coplok teh, bakal aya wargi kinasih anu bakal gering wales. Upami ibak ditaranjang di walungan tea. Maksadna salira bakal mayunan kawiwirang, anu matak hidep kaweur bingung. Dupi cai walungan tea herang atanapi kiruh?” Uing poho naha herang atawa kiruh. “Kiruh abah,” tembal uing asa asa. “Lamun herang matak bingung, lamun kiruh matak bingung nangtung.” Bingung nangtung? Arek nanya deui, tapi era bari hate ratug.
 ·  ·  · 2 seconds ago

Selasa, 03 April 2012

CAAH


Fikmin #CAAH#
Saaleutan budak sakola disaragam Pramuka, mapay pipir lamping. Sigana keur peraktek elmu lapangan. "Kahade barudak, ulah meleng bisi tigebrus kana lombang. Heug papay jalanna lalaunan, hiji hiji ngabaduy weh." Mireng kecap ngabaduy, barudak kalahka saleuseurian. Tapi terus kaganti kujerit, waktu hiji siswi oleng awakna. Untung manehna geuwat ngarawel kasajeujeur tambang plastik, anu memang dihaja dipentang dijalur pameuntasan. Tikajauhan langit hideung tanda hujan gede. Teu lila langit angkeb, angin ngagelebut ngoyagkeun tatangkalan. "Hayuh barudak, bisi kaburu hujan." Tacan salse gorowok paguru, ana breg hujan turun manten. Atuh barudak bubar katawuran, tipaparetot silih udag ka saung diseberang kalen. Kari hiji siswi, Nining anu can nepi kapeuntas, kaburu datang caah anu mebeskeun sukuna kana lombang. Ningali bahaya, paguru anu tos sepuh, langsung anclom kana caah anu tarik. Pananganana ngarawel jaket siswi, bari narik dikabehluhurkeun. Ngan kitu duaanana bade hanjat, paguru tisoledat. Mastakana ninggang batu, terus ngagolosor kana caah kacandak palid. Nining nagog ngabangingik.
 ·  ·  · 2 seconds ago

HAREWOS


Fikmin #HAREWOS#
Kuring mah lain arek ngabibisani, tapi pangalaman keur ngora. Salah sahiji adat goreng urang umbul Lingarjati tea, nyaeta sok ngaharewos. Kapan teu dimana teu dimendi, tangtu aya weh anu sok menyalurkeun hobbi rewos tea. Mending lamun anu diharewoskeun sifatna penting boh rusiah. "Eman kadieu." Saur wak Mi, keur pendak di alun alun sakaluarna kuring ti masigit Al-Falah. Namina oge katetehna pun bapa, atuh tangtu diperyogikeun. Terus wak Mi nyarios kieu, "lain Eman, si uwa mah ewes ewes ewes." Saurna bari jengke, ngadeketkeun lambena. Ngan eta bari socana gular giler, atuh matak janten perhatian balarea. Padahal lamun nyarios ewes ewesna bari ngagorowok oge da moal matak nanaon, kapan lain rusiah. Tah kalakuan kitu tea nyampak dimana wae. Naha di Lingarjati, keur ka pasar Cilimus, lamun di Jakarta, pon kitu oge lamun keur nganjang kaanu di Bandung boh Palembang. Hehe, aneh. Tapi teuing ketah kumaha generasi Linggajati ayeuna? Asana mah moal sugan.
 ·  ·  · 2 seconds ago