skip to main |
skip to sidebar
Fikmin #TABRAK LARI#
Enya lebu, anu narempel dina parabotan jarang kapake. Anu diteundeun diurut sepen. Bieu mah sapeuting jeput batuk ngoklok tikoro arateul, pedah luluasan hees, sosoranganan. Kapan pamajikan keur nyaba ka Tangerang, sosoranganan. Kudu, cenah mah. Kapan dikeur ngorana luas luslos kamamana oge kerepna nyorangan. Heueuh kapan cak dokter oge kudu loba leumpang. Cara bareto weh keur ngora. Ulah cara salaki, anu siga otobis anu karoserina tina kai zaman baheula. Anu jandelana anjlok kahandap lamun muka. Anu sora mesinna 'u'u'u'uan lamun nanjak di parapatan Degung ka beh Bhayangkaraan. Gusti, ieu kuring ngalaku lampah. Ngukur jalan sapopoe tandaning hurip. Anu sabeulah keruk dina kelek, anu sabelah suku sapatu teuing bakiak. Anu keur nyabrang tengah peuting, kapan beuteung lapar eusieun. Teuing saha jalma tea, numpak motor mani harus. Jaba teu make lampu, ka beh pasar palabuan. Leng sakuriling asa bodas. Saentas sirah ngajedak kana aspal. Karasa jalma rame, waktu ngapung kaluhur bari tiris.
Fikmin #DEKOK TAPAK#
Sok hayang seuri lamun inget kana cara kang Arga, waktu dagang obat dipinggir jalan. Bari ngabongohan panongton, gap leungeun katuhu ngaragamang kana jero kantong lamak hideung anu atra eusi bedog. Kitu bedog kaluar, ana bras diheumbatkeun kana leungeun kenca. Atuh panongton pada ngagoak kaget, ningali mata bedog tinggaleun dina leungeun kenca. Ku kang Arga leungeun tea dibura ku cai anu diuyup tina gelas. Terus rembes weh getih beureum tina tapak bedog dileungeunna. Bari bedog masih napel dina leungeunna, kang Arga ngurilingan kalangan. Terus ngasupkeun leungeun jeung bedogna kana peti, anu ditutup ku lawon hideung. Kitu leungeun katuhu diasupkeun kana peti, terus dua leungeun kaluar, bari tatu leungeun geus dibungkus ku lawon hideung. Ujung lawon dicabut, leungeun sehat. Bari kang Arga ngajura ka opat panjuru panongton. Tapi dina hiji mangsa, teuing kumaha aya anu salah ngasupkeun bedog kana kantong lawon hideung. Lain bedog anu bonghak saparo tengahna, tapi Ciomas anu weuteuh.
Fikmin #OWAH GINGSIR#
Kakapeungan sok aya wae, kenalan make nomer sejen anu salah kirim sms. Terus aya bewara, “hapunten bah, abdi salah ngintun sms.” Tapi lolobana mah tara aya kabar susulan. Kukituna sok diantep weh, kapan nomerna oge teu dikenal. Makana sok tara dipikiran, lajuna eta sms langsung diapus bae. Bisi memang bener teu dihaja manehna salah kirim. Pikiran teh, lamun dihaja mah tangtu bakal ngahubungan deui. Sanajan enya sok jadi pikiran, bakal ninggang kana naon. Tapi ngarana oge jalma, sokan aya anu owah gingsir, teuing anu beuki lila asa beuki ngaco. Tapi naha enya?
Fikmin #BU HAJI#
Kiriniiing sora telepon disada. Uing gura giru nyampeurkeun, bisi aya khabar penting. "Assalamu'alaikum." Cekeng teh. "Wa'alaikumsalaam." Kakuping soanten halimpu. Tangtos isteri yeuh. "Eh abah kumaha damang?" Hor saha nya, geuning apal ka uing, tapi uing poekeun sahasahana. "Alhamdulillah pangesto. Kumaha sawangsulna?" Walon uing bari mikir ieu saha. "Dupi ibu aya?" Walerna deui mani marahmay. Beu jaba matak hayang kiih deuih. "Aya, dupi ieu saha?" Masih mikir, "bu Haji." Walonna bari nyakakak. "Sumuhun bu Haji. Tapi saha?" Cekeng rada heuras, kapan ieuh geus sacorcoreun pisan. "Bu Haji Sahari," walonna kaget. Berebet weh uing ka jamban.
Fikmin #LAIN WAYAH#
"Hih ari siabah, nanahaonan ieu teh." Enin kagugahkeun, nyikikik bari ngangsurkeun ramo abah anu hayuh wae ngaleketek. Sanaos bari heran, salaku istri Enin surti naon anu janten kahoyong abah. Tapi piraku, kapan tos lami pisan urang tara kikituan teh. Kapan saur abah oge, "lah nyi tos lain wayah kikituan tea, matak awak lungse, tangtu ibadah bakal kaganggu." Lalaunan Enin maksa mindahkeun panangan abah, anu hayoh weh ngekewek, bari sora napasna haroshos kawas anu mengi. Tapi geuning abah nurut, paham kana maksad Enin. Ningali abah simpe, jut Enin turun bade kacai, kapan sora jam disada teng dua kali. Tanda lebet ka awal mangsa janari. Parele maos Al-Quran, teras shalat sunnah. Enin cengkat ti pangcalikan, bade ngageuingkeun abah. Kapan parantos kakuping shalawat. Kitu Enin lebet ka kamer, geuning kutibra kulemna abah. Karaos tiis waktos dicepeng panangan. Taya ambekan waktos digeuing beh dada. Enin ngahurungkeun lampu, lajeng enggal nelepon palaputra. Innalillahi ...
Fikmin #NGALAMUNKEUN#
Kapeung sok humandeuar, naha leres tiasa nyerat fikmin anu hade, anu kaaku ku jagad. Kapan rumaos bekel Sundana oge minimalis. Pedah kapungkur sok macaan Mangle. Salangkungna digali tina pengalaman diri. Duka tah, mung seja ngiring, manawi kaaos weh tos pirang2 nuhun. Aya bekelan pun bojo, kamus Sunda-Indonesia ti Pustaka Setia. "Ulah sok ngalamunkeun diri atuh bah, lamun teu mampuh nya entos." Wew hehe, piraku keur ki Sunda anu teu weleh dipicinta, matak eleh deet kituh.
Fikmin #ENDAH#
Keur pamitan basa arek mulang ka Jakarta. Aya sora halimpu anu ngucapkeun salam. Nyes matak tiis kana hate, matak gumbira kana qalbu. Saharita 5 pasang mata jalu ngalieuk ka beh lawang panto. Disorot ku loba mata careuh mah, mojang tea bangun anu geumpeur bari ngadeg, ramona riweuh silih itung, bari nyonyoo pita biru. Sakedet netra karasa socana nyirorot, tapi tungkul deui bari leungeun semu ngageter. Pedah kuring anu pangdeukeutna, sacara jentelmen kuring ngahiap sigeulis tea disina lebet. Alhamdulillah. Acara balik disore eta bolay tah. Diganti silaturahim ka bumina Endah.